Huxanavélin

Obbosí

Sun, 01 Mar 2009 12:57:56 GMT

Frá stofnun þessa bloggs hef ég reynt að blogga að minnsta kosti einu sinni í mánuði. Nú klikkaði ég á febrúar. Mínus. Jæja, það verður ekki aftur snúið með það. Svei mér þá ef lífið mun ekki halda áfram án þess. Gleðilegan marsmánuð.

Já, nú hef ég aldeilis...

Tue, 20 Jan 2009 16:18:19 GMT

...staðið mig vel. Glöggir lesendur hafa væntanlega áttað sig á því að hér hefur ekki verið bloggað af slíkum krafti í þrjú ár og eru að öllum líkindum orðnir þreyttir á bullinu. Ég líka.

Heimsins besti eiginmaður er búinn að húla yfir sig og er væntanlegur heim í fyrramálið. Ég þarf þá ekki lengur að flytja honum veruleikaskertar hugleiðingar mínar í gegnum þessa bloggsíðu lengur, ég get sprautað þeim beint í æð. Bæ.

Og nú...

Mon, 19 Jan 2009 18:26:22 GMT

Líður mér eins og við séum í raun Túrkmenar, undir stjórn eins eilífðar Túrkmenabasa sem Morgunblaðið var svo duglegt við að flytja okkur fréttir af hér í eina tíð, á meðan við töldum okkur enn með siðmenntuðum þjóðum og héldum að við værum þess umkomin að hlæja að auðnuleysingjum.

Hér eru spillingarskítahaugar úti um allar trissur sem stóru kallarnir keppast við að breiða yfir, hver sem betur getur og passa að við fáum engar fréttir af neinu, slá ryki í augu okkar og meira að segja smjörklípur eru steinhættar að virka nokkurstaðar, þær sem þó gáfu okkur smá hressingu á meðan menn reyndu að sleikja þær af sér, en það reynir engin lengur, þeir sitja bara á smjörfjalli og láta sér fátt um finnast í einu risavöxnu þagnarbandalagi.

Og á meðan öllu þessu stendur er líka merkilegt að segja frá því að enn er til stór hópur fólks sem finnst það vera í meira lagi öfgakennt að fara og mótmæla á Austurvelli. Svoleiðis aðgerðir lýsa nefnilega engu nema vanvirðingu við stjórnvöld og ekki vilja undirlægjur og höfðingasleikjur verða uppvísar að því.

Þannig er mér sagt að Túrkmenska þjóðin hafi hagað sér. Ég dró það stundum í efa að þar væru allir sáttir við að þjóðarleiðtoginn skyldi vera hálfviti. En eftir að hafa séð til hinnar þolinmóðu íslensku þjóðar, sem lætur þetta allt yfir sig ganga, þá trúi ég því.

Brenglaðar hugmyndir

Sun, 18 Jan 2009 19:30:37 GMT

Jæja. Mikið er nú gaman að sendiboðar Ísraels skuli vilja ferðast um heimsbyggðina og leiðrétta þann misskilning að það sé ljótt að drepa saklaust fólk. Það er bara víst alls ekkert ljótt, segja þeir. Merkilegt. Þær útskýringar myndu sannarlega kollvarpa öllum þeim hugmyndum sem ég hef um siðuð samfélög og eðlileg samskipti. En kannski er ég bara þröngsýn og fordómafull.

Og þá að öðru. Eiginmaður minn er týndur og tröllum gefinn. Síðast spurðist til hans á Tahítí eyjum í fangi föngulegra húladansmeyja. Smellið hér til að virða fyrir yður sönnunargögnin. Nei, þetta er ekki nýkjörinn formaður Framsóknarflokksins sem þarna stendur í meyjafansi, þetta er karlinn minn. Þeir sem hafa einhverjar upplýsingar um ferðir hans eru beðnir um að láta vita í kommentakerfinu.

Ein ég sit og hiksta

Sat, 17 Jan 2009 21:49:05 GMT

Góða kvöldið. Börnin mín fóru í bústaðarferð með afa sínum og ömmu. Þar af leiðandi var útlit fyrir að ég yrði ein í allan dag. Jahá. Hvað gerir maður undir þeim kringumstæðum? Maður hringir í mömmu sína og dregur hana með sér á mótmæli á Austurvelli. Munið það bara, gott fólk. Það er hin eina rétta leið þegar maður er einn og barnlaus.

Jæja. Haldið ekki að ég hafi staðið í makindum og góðum fíling í þvögunni á Austurvelli þegar ég sé skyndilega skilti rísa upp úr mannhafinu með áletruninni:

VIÐ VILJUM KOSTNINGAR STRAX!

Ég rauk í lesblinda manninn, reif af honum skiltið, steingleymdi því að ég væri á friðsamlegum mótmælum og barði hann í hausinn með því.

Ég: Veistu ekki að kosningar eru ekki skrifaðar með t-i, addna lesblindi aulinn þinn?

Kjökrandi hræddur maður: E..ert þú ekki konan sem hefur barist svo ötullega fyrir frjálsri stafsetningu? Þú sem stafsetur bara nákvæmlega eins og þér sjálfri sýnist og lætur engan segja þér fyrir verkum?

Og þá mundi ég það. Það er einmitt ég.

Guði sé lof að það er föstudagur.

Fri, 16 Jan 2009 15:44:30 GMT

Þessi fallegi dagur, þessi fallegi dagur... (nú geta lesendur ímyndað sér að undir hljómi söngur Buffa Morteins og að Dagur B. Eggertsson skokki ber að ofan eftir gylltri ströndu og láti vindinn leika um hár sitt. Það er samt alls ekki það sem ég var að ýja að með mínum hljómfagra söng.)

Nei. Á föstudögum skín sólin skærar og regnbogar skreyta Kópavoginn. Þá er jafnframt minni úrkoma en aðra daga og oftast mun hlýrra, þar er heitur sumardagur um miðjan vetur á föstudögum. Þá syngja líka þrestir og páfuglar breiða út stél sín. Fólk dansar konga á götum úti og skálar við börnin sín í límónaði, spilar á bongótrommur og blæs sápukúlur. Hundrað hvítar dúfur fljúga yfir bæinn og kúka lakkrískarmellum yfir mannskapinn sem reynir að gleypa þær með opinn munnin gapandi til himins. Á föstudögum baða sig líka allir í rjóma, sættast við óvini sína, leysa deilur, fyrirgefa syndir, elska hvort annað og njóta þess að vera til.

Gleðilegan föstudag.

Símtal frá Ástralíu

Thu, 15 Jan 2009 15:16:29 GMT

Í morgun fékk ég nokkurnvegin svona símtal:

Ég: Halló?

Besti: Hæ.

Ég: Gaman að heyra í þér! Hvað er að frétta?

Besti: Sömuleiðis. Það er ekkert að frétta. Ég bara hringdi til að segja hæ.

Ég: Alla leið frá Ástralíu?... Hæ.

Besti: ... og til að spyrja hvort okkur vantar ekki diggerídú.

Ég: Diggerídú? Ertu að tala um ástralska frumbyggjahljóðfærið? Það er heljarstórt!

Besti: Já, en þeir senda heim. Þetta væri svona stofustáss.

Ég: Nei, er það ekki soldið yfirdrifið? Okkur vantar það ekki. Ekki kaupa það.

Besti: Ertu viss? Ég læt þá kannski bara kengúruskinnið duga?

Ég: Nei, nei, ekkert diggerídú og ekkert kengúruskinn.

Besti: Ég er búin að kaupa kengúruskinnið.

Ég: ...

Besti: Það er bara lítið sko. Lítið skinn. Tekur ekki mikið pláss.

Ég: Heyrðu, það er bara fínt þá. Ég finn handa því pláss í geymslunni við hliðina á hreindýraskinninu.

Besti: Nei, nei, það verður æðislegt uppi í bústað.

Ég: Já, frábært. Segjum það. Sé þig á miðvikudaginn.

Þetta er örugglega rosalega eigulegt kengúruskinn. Ég spyr mig samt... hversu mikill er tímamismunurinn við Ástralíu? Getur verið að þar sé ennþá árið 2007?

Það væri nú gaman að hafa kosningar

Wed, 14 Jan 2009 19:56:40 GMT

Nú fer ég bráðum að verða tilbúin fyrir kosningar.

(Til gamans vil ég benda þeim lesendum sem lenda ítrekað í erfiðleikum með að stafa orðið kosningar, á að það er ekki skrifað með t, kostningar, en sá ritháttur virðist eiga vaxandi en óverðskulduðum vinsældum að fagna.)

Ég myndi helst vilja kjósa stjórnmálaflokk með listabókstafinn M.

X-M.

Exem.

HAHAHAHAHA!

Ég spái í stefnumálin síðar.

Höfuðverkur

Tue, 13 Jan 2009 16:05:29 GMT

Huxanavélin verður lokuð í dag vegna höfuðverkjar. Við biðjumst velvirðingar á þeim truflunum sem þetta kann að hafa í för með sér.

Opnum aftur á morgun, miðvikudaginn 14. janúar.

Einkarekin heilbrigðisþjónusta

Mon, 12 Jan 2009 17:40:48 GMT

Já. Þarna kom loksins eðlilega alvörugefin titill á bloggfærslu héðan. Það hefur lengi mátt bíða eftir honum.

Nema hvað. Í dag fór ég á klíník til að reyna að losa mig við hinar hræðilega fjólubláu kinnar sem hafa skreytt ásjónu mína lengur en ég kæri mig um. Ekki var það minn fyrsti fundur við doktor Laser, en hann hefur plokkað úr veski mínu óheyrilegar fjárhæðir fyrir laserþjónustu sína.

Ég: Herr doktor Laser, ég held að þetta sé ekki að virka fyrir mig.

Herr doktor Laser: Nú hvað? Ertu ekki aðeins minna fjólublá núna en þú varst síðast?

Ég: Nei herr doktor Laser, ég er ívið fjólublárri.

Herr doktor Laser skoðar fjólublár kinnar mínar gaumgæfilega

Herr doktor Laser: Nú... hvur rækallinn? Ég sé það núna að þú ert sennilega ekki með fjólubláu veikina! Þú ert bara með exem!

Ég: Nú hvaða hvaða! Ég slepp þá kannski bara við að koma í laservélina til þín aftur og get frekar varið fjármununum í að klára lóðarlánið?

Herr doktor Laser: Ehh.. uhh... nei, nei. Við skulum nú klára meðferðina við fjólubláu veikinni. Ekki flana að neinu.

Ekki vill maður draga orð doktors í efa. En þegar ég veit að hann á sjálfur þetta klíník og borgaði sjálfur fyrir fjólubláu laservélina... og að mínir peningar fara í að borga hana niður... get ég þá treyst dómgreind Herr doktors Lasers og umhyggju hans fyrir heilsu minni?

Bara pæling fyrir ykkur einkavæðingarsinna.

Harðsperrur frá helvíti

Sun, 11 Jan 2009 08:03:37 GMT

Kæru landsmenn. Ég er spýtukarl og fuglahræða. Ég er hundrað ára gömul kona í göngugrind. Ég er ófrísk kona með grindargliðnun og gamall maður með ónýtan mjaðmalið.

Ég er vélmenni.

Ég kemst varla óstudd á klósett. Ég þori ekki að fara í baðkarið til að lina þjáningarnar... ég gæti aldrei staðið upp úr því aftur.

Ég dey. Ég dey. Ég dey.

Á morgun á ég aftur stefnumót við Jimbóinn sem hatar mig.

Ég dey.

Bankakreppan

Sat, 10 Jan 2009 08:35:25 GMT

Mæðgur sitja við matborðið og hlusta á kvöldfréttirnar.

Dóttir, 7 ára: Mamma, af hverju féll Glitnir?

Móðir, 36 ára: Öhhh... það er mjög flókið. Fólk er ekki einu sinni sammála um af hverju það gerðist.

Dóttir, 7 ára: Viltu reyna að útskýra það? Mig langar að skilja það.

Móðir, 36 ára: Öhhh... sko...Glitnir var íslenskur banki sem átti aðallega íslenska peninga. Hann hafði samt tekið lán í útlenskum bönkum sem lánuðu honum útlenska peninga. Svo kom að því að útlensku bankarnir vildu fá peningana sína til baka, en Glitnir gat ekki látið þá hafa peningana sína því þeir áttu bara íslenskar krónur. Útlendingarnir vildu ekki sjá krónurnar og Glitnir gat ekki borgað útlensku peningana. Þessvegna féll hann. Það gerðist af því að hann gat ekki borgað skuldirnar.

Dóttir, 7 ára: Mikið var það leiðinlegt. Vilt þú ekki bara borga fyrir hann?

Móðir, 36 ára: Nei, það vil ég alls ekki.

Dóttir, 7 ára: Er það af því að þú átt ekki nóga peninga eða af því að þú vilt það ekki?

Móðir, 36 ára: Bæði.

Dóttir, 7 ára: Mér finnst það ekki gott hjá þér mamma. Ef ég ætti fullt af peningum, þá myndi ég hjálpa bönkunum að borga skuldirnar sínar.

Móðir, 36 ára: Ekki hafa neinar áhyggjur elskan mín, þú átt sannarlega eftir að fá að gera það.

Dóttir, 7 ára: Gott.

Leikfimin

Fri, 09 Jan 2009 16:06:53 GMT

Ég vaknaði klukkan hálf sex í morgun til að sprikla með mjúku kerlingunum. Þær reyndust vera mjúkar, alveg eins og ég. Ekki töff gellur.

Jimbo mætti með svipuna sína, fúll út í mig fyrir að hafa soðið sig í potti og vildi augljóslega hefna sín á mér. Melurinn.

Jimbo: Nú skaliði taka lóð, þrjátíu kíló og lyvta ðeim yfir hövuðið sexhúndrað sinnum eða þangað til ðið deijið, hvort sem kémúr á úndan.

Ég lyfti tvisvar.

Ég: Ég er að deyja.

Jimbo: Þú er algjör aujmmingi, þú gedar ekki neitt. Sjáðú bara ðessar konur hinar, allar búnar að vera hjerna lengri tíma, þær gjeta allar mikið. Þú koma bara nokkra sinnum, þá getur þú líga mikið.

Ég: Ókei, Jimbó. Ef þessar gellur eru búnar að vera svona lengi hérna og kasta fimmtíukílóa lóðum á milli sín á meðan þær sippa... af hverju eru þær þá svona ferlega feitar, þarna melurinn þinn?!

Ókei. Þetta gerðist ekki svona. Ég sýndi háttvísi af því að ég er vel upp alin. Þetta hefði samt getað verið svona. Bæ.

Líkamlega atgervið

Thu, 08 Jan 2009 20:37:15 GMT

Ég ætla að fara í ræktina á morgun að sprikla með mjúku kerlengonom. Ég vona að þær hrökkvi ekki í kút og kleinu þegar þær sjá svona ýkt sjúkheit eins og mig smeygja sér í þeirra raðir. Ég myndi ekki lá þeim það. Þau eru í ættinni þessi góðu líkamlegu atgervisgen.

Ég fékk nefnilega símtal í gær frá þjálfara Gerplu sem sagði mér barasta svona prívat og persónulega að dóttir mín væri það allramesta fimleikadrottningarefni sem nokkurstaðar hefði sést á byggðu bóli frá því talningar hófust og Rúnar Alexandersson fékk íslenskan ríkisborgararétt.

Og hafiði það.

Ég var bara vinsamlegast beðin um að gera dóttur minni og þjóðinni allri þann greiða að auka á möguleika hennar á alþjóðlegri hylli og heimsmeistaragráðum með því að gjörasvovel að veita blessun mína á tilfærslu úr "Geturekkirassgat" byrjendahópnum yfir í "FrægðogframibíðurþínóþúvonarstjarnaÍslands" hópinn. Ekki þurfti ég að leggja neitt af mörkum til að þessi tilfærsla gæti orðið, nema oggulítið hærri æfingagjöld, bara pínkuponsu, nánast ekkert, bara helmingi hærri í raun, en æfingatíminn er auðvitað líka helmingi meiri og hvað greiðir maður ekki fyrir svona tækifæri, hvað er maður að setja peninga fyrir sig, þessa ómerkilegu bleðla þegar framtíð barnsins er í húfi. Ég borga bara með stjörnur í augum og vonarglampa. Sæl að sinni.

Ræktarleg

Wed, 07 Jan 2009 20:33:38 GMT

Góðir landsmenn. Ég er orðin meiri að umfangi en ég hef nokkurn tíma verið. Ekki get ég sætt mig við ástand þetta, svo að ég fór um langa vegu til að fá bót mála.

Hitti ég fyrir tröllkarlinn Jimbo sem hefur af því lifibrauð að láta fólk svitna.

Jimbo: Hohoho... lánt síðan ég sjá þig!
Ég: Já... ég er búin að vera upptekin við að láta mig fitna.
Jimbo: Hohoh... ekki hava áhiggjur... Jimbo skal laga þig.

Og þá svitnaði ég strax við tilhugsunina.

Jimbo: Það er best að þú koma eldsnemma á mordna og verðir með hóbur sem ég er að þjálva. Það verður mjög gott fyrir þig.
Ég: Eru þetta svona mjúkar kerlingar eða töff gellur (eins og ég)?
Jimbo: Ekki hava áhiggjur, þetta eru allt mjúkar kerlingar... svona einso þú.

Fyrir þessi ummæli stakk ég honum í poka og skellti honum á bak mér, gekk með hann upp í stóran helli til Grýlu þar sem við mjúku kerlingarnar suðum Jimbo í potti. Köttur úti í mýri, setti upp á sér stýri, úti er ævintýri.